• Home
  • News
  • കേരളത്തിൽ സിനിമ ടിക്കറ്റ് നിരക്ക് വർദ്ധനവ് ഇല്ല ;സർക്കാർ ഉത്തരവ് സ്റ്റേ ചെയ്തു
movie ticket

കേരളത്തിൽ സിനിമ ടിക്കറ്റ് നിരക്ക് വർദ്ധനവ് ഇല്ല ;സർക്കാർ ഉത്തരവ് സ്റ്റേ ചെയ്തു

ജിഎസ്ടിക്ക് പുറമേ സിനിമാ ടിക്കറ്റുകളിൽ വിനോദ നികുതി കൂടി ചുമത്താനുള്ള സർക്കാർ ഉത്തരവ് ഹൈക്കോടതി സ്റ്റേ ചെയ്തു. വിനോദ നികുതി ചുമത്താനുള്ള അ‌ധികാരം സർക്കാരിനല്ല തദ്ദേശ സ്ഥാപനങ്ങൾക്കാണെന്ന വാദം അംഗീകരിച്ചാണ് ഉത്തരവിന് താൽക്കാലിക സ്റ്റേ നൽകിയിരിക്കുന്നത്. പ്രേക്ഷകരെ പ്രതിനിധീകരിച്ച് സുജിത് മജീദ് എന്നയാൾ നൽകിയ ഹർജിയിലാണ് കോടതി നടപടി.സെപ്റ്റംബർ ഒന്നു മുതൽ സിനിമാ ടിക്കറ്റുകളിൽ വിനോദ നികുതി കൂടി ഉൾപ്പെടുത്താനായിരുന്നു സർക്കാർ ഉത്തരവ്. 100 രൂപയിൽ താഴെയുള്ള ടിക്കറ്റുകൾക്ക് അ‌ഞ്ചു ശതമാനവും 100 രൂപയ്ക്ക് മുകളിലുള്ളവയ്ക്ക് 8.5 ശതമാനം വിനോദ നികുതിയും ചുമത്താനായിരുന്നു തീരുമാനം.

ജിഎസ്ടി നിലവിൽ വന്നപ്പോഴാണു തദ്ദേശ സ്ഥാപനങ്ങൾ പിരിച്ചിരുന്ന വിനോദ നികുതി സർക്കാർ ഒഴിവാക്കിയത്. കഴിഞ്ഞ ജനുവരി ഒന്നു മുതൽ സിനിമാ ടിക്കറ്റിന്റെ ജിഎസ്ടി നിരക്ക് 28 ശതമാനത്തിൽ നിന്നു 18 ആയി കുറച്ച സാഹചര്യത്തിൽ തദ്ദേശ സ്ഥാപനങ്ങൾ മുൻപ് പിരിച്ചിരുന്ന വിനോദ നികുതി പുനഃസ്ഥാപിക്കാൻ സർക്കാർ തീരുമാനിച്ചു.

ഇതനുസരിച്ച് 10% വരെ വിനോദനികുതി ഏർപ്പെടുത്തുന്നതിനു നിയമ ഭേദഗതി കൊണ്ടു വന്നു. എന്നാൽ ഇതിനെതിരെ ചലച്ചിത്ര രംഗത്തെ സംഘടനകൾ രംഗത്തിറങ്ങുകയും ഹൈക്കോടതി ഇടപെടുകയും ചെയ്തു. ഈ സാഹചര്യത്തിലാണു പ്രേക്ഷകർക്ക് അധികഭാരമുണ്ടാകാത്ത വിധത്തിൽ വിനോദ നികുതി ഏർപ്പെടുത്തുന്നതെന്ന് ഉത്തരവിൽ പറയുന്നു.