കാലാവസ്ഥ മോശം, ഖത്തറിൽ മത്സ്യവിലയിൽ 25% വർധന

ദോഹ : കാറ്റും മഴയും ശക്തമായതോടെ പ്രാദേശിക വിപണിയിൽ മീൻ വില ഉയർന്നു. മോശം കാലാവസ്ഥയെ തുടർന്ന് മീൻപിടിത്തം തടസ്സപ്പെട്ടതോടെ ലഭ്യത കുറഞ്ഞതാണ് വില ഉയരാൻ കാരണം. കഴിഞ്ഞ ഏതാനും ദിവസങ്ങളായി മീൻ വിലയിൽ 20 മുതൽ 25% വരെയാണ് വർധന. ഓഫ്‌ഷോറിലെ കനത്ത കാറ്റും തിരയും കാരണം ഭൂരിഭാഗം മീൻപിടിത്തക്കാരും കടൽ യാത്ര ഒഴിവാക്കുകയാണ്. മറ്റ് സമയങ്ങളെ അപേക്ഷിച്ച് ഒക്ടോബർ മുതൽ അടുത്ത വേനൽക്കാലം വരെ നീളുന്ന മീൻപിടിത്ത സീസണിൽ മീൻ വിലയിൽ 10 മുതൽ 20% വരെ കുറവുണ്ടാകുമായിരുന്നു.