വെസ്റ്റ് ഇന്‍ഡീസിനെതിരെ നടക്കാനിരിക്കുന്ന രണ്ടാം ഏകദിന മല്‍സരത്തിനുള്ള 12 അംഗ ഇന്ത്യന്‍ ടീമിനെ പ്രഖ്യാപിച്ചു
ന്യൂഡല്‍ഹി: വെസ്റ്റ് ഇന്‍ഡീസിനെതിരെ നാളെ വിശാഖപട്ടണത്ത് നടക്കാനിരിക്കുന്ന രണ്ടാം ഏകദിന മല്‍സരത്തിനുള്ള 12 അംഗ ഇന്ത്യന്‍ ടീമിനെ പ്രഖ്യാപിച്ചു. ആദ്യ ഏകദിന മല്‍സരത്തില്‍ നിന്ന് മാറ്റങ്ങളില്ലതെയാണ് രണ്ടാം അങ്കത്തിനായി ഇന്ത്യ ഇറങ്ങുന്നത്. ഇന്ത്യയുടെ ബിഗ് ത്രീ ആയി ഉജ്വല ഫോമിലാണ് രോഹിതും ധവാനും കോഹ്ലിയും. ഇവർ ഫോമിലായാൽ ഇന്ത്യയെ തോൽപ്പിക്കുക വിഷമകരമാണെന്നാണ് രണ്ട് വർഷമായി കണ്ടുവരുന്നത്. ഓസ്ട്രേലിയയുടെ വിഖ്യാതമായ മാത്യു ഹെയ്ഡൻ-ആദം ഗിൽക്രിസ്റ്റ്-റിക്കി പോണ്ടിംഗ് ത്രിമൂർത്തികൾക്കും മുകളിലാണ് ഇന്ത്യൻ ബിഗ് ത്രീ. കാരണം, രോഹിത്-ധവാൻ-കോഹ്‌ലി സംഘം 18 തവണ 150ൽ കൂടിയ കൂട്ടുകെട്ട് സ്ഥാപിച്ചു. ഹെയ്ഡൻ-ഗിൽക്രിസ്റ്റ്-പോണ്ടിംഗ് സംഘത്തിന് ഏഴ് തവണമാത്രമേ ആ നേട്ടത്തിലെത്താനായുള്ളൂ.
കോഹ്‌ലി സെഞ്ചുറി നേടുന്നത് എത്ര അനായാസമാണെന്നതാണ് ശ്രദ്ധേയമായ കാര്യം. ഇന്ത്യ റണ്‍സ് പിന്തുടർന്ന് 75 ജയം നേടിയതിൽ 20 സെഞ്ചുറികൾ കോഹ്ലിയുടെ ബാറ്റിൽനിന്ന് പിറന്നു. വേഗത്തിൽ 10,000 റണ്‍സ് എന്ന റിക്കാർഡ് സച്ചിൻ തെണ്ടുൽക്കറിൽനിന്ന് സ്വന്തമാക്കാനുള്ള തയാറെടുപ്പിലാണ് ഇന്ത്യൻ ക്യാപ്റ്റൻ. 212 മത്സരങ്ങളിലെ 204 ഇന്നിംഗ്സിൽനിന്ന് 9919 റണ്‍സ് ആണ് കോഹ്ലിക്ക് ഇപ്പോഴുള്ളത്. 2018ൽ 10 മത്സരങ്ങളിൽനിന്നായി 889 റണ്‍സ് നേടിക്കഴിഞ്ഞു. നാല് സെഞ്ചുറിയും മൂന്ന് അർധ സെഞ്ചുറിയും ഉൾപ്പെടെയാണിത്. 101.25 ആണ് ഈ വർഷം കോഹ്ലിയുടെ സ്ട്രൈക്ക് റേറ്റ്. ഉയർന്ന സ്കോർ 160 നോട്ടൗട്ടും.
