എഫ്സി ഗോവ ഡൽഹി ഡൈനാമോസിനെ തോൽപ്പിച്ചു
മഡ്ഗാവ്: ഐഎസ്എലിൽ ഡൽഹി ഡൈനാമോസിനെതിരേ രണ്ട് തവണ പിന്നിൽനിന്നശേഷം ഗോവ എഫ്സി 2-3ന്റെ ജയം സ്വന്തമാക്കി. ഗോവയ്ക്കായി എഡു ബെഡിയ (54, 89 മിനിറ്റുകൾ) ഇരട്ട ഗോൾ നേടി. ബ്രണ്ടൻ ഫെർണാണ്ടസും (82-ാം മിനിറ്റ്) ഗോവയ്ക്കായി ലക്ഷ്യംകണ്ടു. ബിക്രംജിത്് സിംഗ് (ആറാം മിനിറ്റ്), ലാലിംഗ്സ്വാല ചാങ്തെ (70-ാം മിനിറ്റ്) എന്നിവർ ഡൈനാമോസിനായി വലകുലുക്കി. ജയത്തോടെ ഗോവ പോയിന്റ് പട്ടികയിൽ ഒന്നാം സ്ഥാനത്ത് എത്തി.രണ്ടു തവണ മുന്നിൽ കടന്ന ഡൽഹിയെ അതിഗംഭീര തിരിച്ചുവരവിലൂടെ ഗോവ മലർത്തിയടിക്കുകയായിരുന്നു. ഇതോടെ ആറു കളിയിൽനിന്ന് 13 പോയിന്റുമായി ഗോവ പട്ടികയിൽ ഒന്നാമതെത്തി. അഞ്ചു കളിയിൽനിന്ന് ഇതേ പോയിന്റുമായി ബംഗളൂരുവാണ് രണ്ടാമത്. ഗോൾ ശരാശരിയാണ് ഗോവയെ തുണച്ചത്. ഡൽഹി നാലു പോയിന്റുമായി ഒമ്പതാം സ്ഥാനത്താണ്.