കേരളാ ബ്ലാസ്റ്റേഴ്സിന് മുംബൈക്കെതിരെ ദയനീയ പരാജയം
മുംബൈ: കേരളാ ബ്ലാസ്റ്റേഴ്സിന് മുംബൈക്കെതിരെ ദയനീയ പരാജയം. ഒന്നിനെതിരെ ആറു ഗോളിനായിരുന്നു ബ്ലാസ്റ്റേഴ്സിന്റെ തോൽവി. സെനഗലിൽനിന്നുള്ള മൗദൂ സൗഗുവിന്റെ നാലു ഗോൾ നേട്ടമാണ‌് കളിയുടെ സവിശേഷത. ഐഎസ‌്എൽ ചരിത്രത്തിൽ ആദ്യമാണ‌് ഒരു താരം നാലു ഗോൾ നേടുന്നത‌്. റാഫേൽ ബാസ‌്തോസും മതിയാസ‌് മിരാബഷെയുമാണ‌് മുംബൈയുടെ മറ്റു ഗോളുകൾ നേടിയത‌്. സീമിൻലെൻ ദുംഗൽ ബ്ലാസ്റ്റേഴ്സിന്റെ ആശ്വാസം കണ്ടെത്തി. 24 പോയിന്റുമായി മുംബൈ പട്ടികയിൽ രണ്ടാമത‌് തുടർന്നു. ബ്ലാസ‌്റ്റേഴസ‌് എട്ടാമതും.12-ാം മിനിട്ടിലാണ് സൗഗൗ സ്കോറിംഗ് തുടങ്ങിയത്. മച്ചാഡോയുടെ പാസിൽ നിന്നായിരുന്നു സൗഗൗവിന്റെ ആദ്യ ഗോൾ. 15-ാം മിനിട്ടിൽ റെയ്‌നിയർ ഫെർണാണ്ടസിന്റെ പാസിൽ നിന്ന് രണ്ടാം ഗോളും വീണു. 27-ാം മിനിട്ടിൽ സമിയൻ ഡംഗൽ ഒരു ഗോൾ തിരിച്ചടിച്ചപ്പോൾ ബ്ളാസ്റ്റേഴ്സ് തിരിച്ചുവരുന്നുവെന്ന് തോന്നിച്ചു. എന്നാൽ 30-ാം മിനിട്ടിൽ സുഭാഷിഷ് ബോസിന്റെ ക്രോസിൽ നിന്ന് സൗഗൗ ഹാട്രിക് തികച്ചതോടെ ആ പ്രതീക്ഷയും തകർന്നു.37-ാം മിനിട്ടിൽ ആദ്യ മഞ്ഞക്കാർഡ് കണ്ടിരുന്ന സക്കീർ ആദ്യ പകുതിക്ക് വിസിൽ മുഴങ്ങുന്നതിന് തൊട്ടു മുമ്പാണ് രണ്ടാം മഞ്ഞക്കാർഡും മാർച്ചിംഗ് ഓർഡറും ഏറ്റുവാങ്ങിയത്. രണ്ടാം പകുതിയിൽ വീണ്ടും ഗോളുകൾ ഒന്നൊന്നായ് ഏറ്റുവാങ്ങി നാണംകെടുകയായിരുന്നു ബ്ളാസ്റ്റേഴ്സ്.
