ചെന്നൈ സൂപ്പർ കിംഗ്സിന് ഈ സീസണിലെ ആദ്യ തോൽവി
മുംബൈ: ചെന്നൈ സൂപ്പർ കിംഗ്സിന് ഈ സീസണിലെ ആദ്യ തോൽവി. മുംബൈ ഇന്ത്യൻസിനോട് 37 റണ്സിനാണ് ചെന്നൈ പരാജയപ്പെട്ടത്. മുംബൈ ഉയർത്തിയ 171 റണ്സിന്റെ വിജയലക്ഷ്യം പിന്തുടർന്ന ചെന്നൈയ്ക്കു തുടക്കത്തിൽതന്നെ കനത്ത തിരിച്ചടിയാണ് നേരിട്ടത്. സ്കോർ ബോർഡ് ആറ് റണ്സിൽ എത്തിയപ്പോൾതന്നെ ചെന്നൈയുടെ ഓപ്പണറുമാർ പവലിയൻ കയറി. അംബാട്ടി റായിഡു പുജ്യത്തിനും വാട്സണ് അഞ്ച് റണ്സിനുമാണ് പുറത്തായത്. റെയ്നയ്ക്കും (16) കാര്യമായി സംഭവന ചെയ്യാൻ സാധിച്ചില്ല.
ചെന്നൈ സൂപ്പർ കിംഗ്സിന്റെ ഡ്വെയ്ൻ ബ്രാവോ എറിഞ്ഞ 20-ാം ഓവറിൽ കിറോണ് പൊള്ളാർഡും ഹാർദിക് പാണ്ഡ്യയും ചേർന്ന് 29 റണ്സ് അടിച്ചെടുത്തു. നോബോളിൽ സിക്സ് ഉൾപ്പെടെയായിരുന്നു അത്. മുംബൈക്കായി സൂര്യകുമാർ യാദവ് 43 പന്തിൽ ഒരു സിക്സും എട്ട് ഫോറും അടക്കം 59 റണ്സ് നേടി ടോപ് സ്കോററായി. കൃണാൽ പാണ്ഡ്യ 32 പന്തിൽ 42 റണ്സ് സ്വന്തമാക്കി. ഇരുവരും നാലാം വിക്കറ്റിൽ 62 റണ്സ് കൂട്ടിച്ചേർത്തു. ഏഴ് പന്തിൽ രണ്ട് സിക്സ് ഉൾപ്പെടെ 17 റണ്സുമായി പൊള്ളാർഡും എട്ട് പന്തിൽ മൂന്ന് സിക്സും ഒരു ഫോറും അടക്കം 25 റണ്സുമായി ഹാർദിക് പാണ്ഡ്യയും പുറത്താകാതെനിന്നു. മറുപടിക്കായി ക്രീസിലെത്തിയ ചെന്നൈക്ക് ആറ് റണ്സ് എടുക്കുന്നതിനിടെ രണ്ട് വിക്കറ്റ് നഷ്ടപ്പെട്ടു.