സണ്‍റൈസേഴ്സ് ഹൈദരാബാദിനെ കീഴടക്കി ഡൽഹി ക്യാപ്പിറ്റൽസ് ക്വാളിഫയർ രണ്ടിലേക്ക്
വിശാഖപട്ടണം: പന്ത്രണ്ടാം എഡിഷൻ ഐപിഎൽ പ്ലേ ഓഫിലെ എലിമിനേറ്റർ പോരാട്ടത്തിൽ സണ്‍റൈസേഴ്സ് ഹൈദരാബാദിനെ കീഴടക്കി ഡൽഹി ക്യാപ്പിറ്റൽസ് ക്വാളിഫയർ രണ്ടിലേക്ക് യോഗ്യത നേടി. ടോസ് നഷ്ടപ്പെട്ട് ക്രീസിലെത്തിയ സണ്‍റൈസേഴ്സ് നിശ്ചിത 20 ഓവറിൽ എട്ട് വിക്കറ്റ് നഷ്ടത്തിൽ 162 റണ്‍സ് നേടി. 21 പന്തിൽ 49 റണ്‍സ് നേടിയ പന്തും 38 പന്തിൽ 56 റണ്‍സ് നേടിയ ഷായും ചേർന്ന് ക്യാപ്പിറ്റൽസിനെ രണ്ട് വിക്കറ്റ് ജയത്തിലെത്തിച്ചു. 19.5 ഓവറിൽ എട്ട് വിക്കറ്റ് നഷ്ടത്തിൽ 165 റൺസ് ഡൽഹി നേടി. 36 പന്തിൽ 30 റണ്‍സ് നേടിയ മനീഷ് പാണ്ഡെയാണ് സണ്‍റൈസേഴ്സ് ഇന്നിംഗ്സിലെ മെല്ലപോക്കുകാരൻ. സ്കോർ ഉയർത്താൻ സഹായിച്ചത് 11 പന്തിൽ 25 റണ്‍സ് നേടിയ വിജയ് ശങ്കറും 13 പന്തിൽ 20 റണ്‍സ് നേടിയ മുഹമ്മദ് നബിയും 19 പന്തിൽ 36 റണ്‍സ് നേടിയ മാർട്ടിൻ ഗപ്റ്റിലുമായിരുന്നു. ഗപ്റ്റിലാണ് സണ്‍റൈസേഴ്സ് ഇന്നിംഗ്സിലെ ടോപ് സ്കോറർ. രണ്ട് സിക്സും ആറ് ഫോറും അടക്കമാണ് പൃഥ്വി ഷായുടെ ഇന്നിംഗ്സ്. പന്തിന്‍റെ ബാറ്റിൽനിന്ന് അഞ്ച് സിക്സും രണ്ട് ഫോറും പിറന്നു. സ്കോർബോർഡിൽ 66 റണ്സുള്ളപ്പോൾ ശിഖർ ധവാൻ (17 റണ്‍സ്) മടങ്ങിയിരുന്നു. ശ്രേയസ് അയ്യറെയും (എട്ട് റണ്‍സ്) പൃഥ്വി ഷായെയും 11-ാം ഓവറിൽ മടക്കി ഖലീൽ അഹമ്മദ് ഡൽഹിക്ക് പ്രഹരമേൽപ്പിച്ചു.
