ആഭ്യന്തര ഹജ്ജ്​ അനുമതി പത്രം മെയ്​ അഞ്ച്​​ മുതലെന്ന് സൗദി ഹജ്ജ്​ ഉംറ മന്ത്രാലയം

ജിദ്ദ : ആഭ്യന്തര തീർഥാടകർക്ക് ഹജ്ജിന്​ നിശ്ചയിച്ച ഫീസിന്റെ​ രണ്ടാം ഗഡു കൃത്യസമയത്ത് അടക്കുന്നതിലെ കാലതാമസം വരുത്തിയവുടെ ബുക്കിങ്​ റദ്ദാക്കുമെന്ന്​​ സൗദി ഹജ്ജ്​ ഉംറ മന്ത്രാലയം. രണ്ടാം ഗഡു നൽകാനുള്ള സമയപരിധി അവസാനിച്ചിട്ടുണ്ട്​. ബുക്കിങ്ങിനുള്ള പണമടക്കൽ ‘സദാദ്’ സംവിധാനത്തിലൂടെ മാത്രമാണ്​. മൂന്നാമത്തെ അടവിനുള്ള സമയപരിധി മെയ്​ ഒന്ന്​ (ശവ്വാൽ പത്തിന്​ മുമ്പ്​) ആണെന്നും ഹജ്ജ്​ ഉംറ മന്ത്രാലയം പറഞ്ഞു.

രണ്ടാമത്തെ അടവ്​ നൽകാത്തതിനാൽ ബുക്കിങ്​ റദ്ദാക്കിയാൽ സീറ്റുകളുടെ ലഭ്യതക്കനുസരിച്ച്​ ഹജ്ജിന് വീണ്ടും​ ബുക്ക്​ ചെയ്യാവുന്നതാണ്​. ഓരോ പാക്കേജിലും ലഭ്യമായ സീറ്റുകൾക്കനുസൃതമായി പാക്കേജുകൾ കാണാം. സാധുവായ ദേശീയ ഐഡൻറിയോ ഇഖാമയോ ഉള്ളവർക്ക് മാത്രമേ ഹജ്ജ്​ ബുക്കിങ്​ നടത്താൻ കഴിയൂ. ഹജ്ജ് പാക്കേജ്​ ഫീസ്​ അടവും ബുക്കിങും​ പൂർത്തിയാക്കിയാൽ ആഭ്യന്തര മന്ത്രാലയം ശവ്വാൽ 15 (മെയ് അഞ്ച്) മുതൽ പെർമിറ്റ് നൽകി തുടങ്ങും. ഇഷ്യൂ ചെയ്ത പെർമിറ്റ് നമ്പർ സഹിതം അപേക്ഷന്​ സന്ദേശം അയക്കും. അപേക്ഷകന്​ ‘അബ്ഷിർ’ പ്ലാറ്റ്‌ഫോം വഴി ഹജ്ജ് പെർമിറ്റ് പ്രിന്‍റ് ചെയ്യാമെന്നും ഹജ്ജ്​ ഉംറ മന്ത്രാലയം അറിയിച്ചു.

ആരെങ്കിലും തങ്ങളുടെ ബുക്കിങ്​ റദ്ദാക്കാൻ ആഗ്രഹിക്കുന്നുവെങ്കിൽ അവർക്ക്​ ആഭ്യന്തര തീർഥാടകർക്കുള്ള ഇലക്‌ട്രോണിക് സൈറ്റിന്റെ ഹോം പേജിൽ ബുക്കിങ്​ റദ്ദാക്കൽ, കാശ്​ മടക്കി കിട്ടാനുള്ള രീതി എന്നിവ സംബന്ധിച്ച എല്ലാ വിശദാംശങ്ങളും കാണാമെന്നും വേണ്ട രീതികൾ തെരഞ്ഞെടുക്കാമെന്നും ഹജ്ജ്​ ഉംറ മന്ത്രാലയം പറഞ്ഞു.