ഷാർജയിൽ സർക്കാർ ജീവനക്കാർക്ക് വെള്ളി, ശനി, ഞായർ അവധി; ഉൽപാദന ക്ഷമത 90% വർധിച്ചു

ഷാർജ∙ പ്രവൃത്തി ദിനം ആഴ്ചയിൽ 4 ദിവസമാക്കി കുറച്ച ഷാർജയിൽ ജീവനക്കാരുടെ ഉൽപാദന ക്ഷമത 90% വർധിച്ചു. സംതൃപ്തി, സന്തോഷ എന്നിവയുടെ സൂചിക 90% ഉയർന്നപ്പോൾ രോഗാവധി (സിക്ക് ലീവ്) 46% കുറഞ്ഞു. ഷാർജ ഉപഭരണാധികാരിയും കിരീടാവകാശിയുമായ ഷെയ്ഖ് സുൽത്താൻ ബിൻ മുഹമ്മദ് ബിൻ സുൽത്താൻ അൽ ഖാസിമിയുടെ അധ്യക്ഷതയിൽ ചേർന്ന ഷാർജ എക്‌സിക്യൂട്ടിവ് കൗൺസിലിൽ (എസ്ഇസി) യോഗത്തിലാണ് ഈ വെളിപ്പെടുത്തൽ.

യുഎഇയിൽ 2022 മുതൽ പ്രവൃത്തി ദിനം നാലര ദിവസമാക്കി കുറച്ചപ്പോൾ ഷാർജ അത് 4 ദിവസമാക്കുകയായിരുന്നു. ഷാർജയിലെ സർക്കാർ ജീവനക്കാർക്ക് വെള്ളി, ശനി, ഞായർ ദിവസങ്ങളിലാണ് അവധി. വ്യത്യസ്ത മേഖലകളിലെ സമഗ്ര വികസനത്തിനും  എമിറേറ്റിന്റെ സ്ഥാനം മെച്ചപ്പെടുത്തുന്നതിനും ഇതു കാരണമായതായി റിപ്പോർട്ട് ചൂണ്ടിക്കാട്ടുന്നു. ഷാർജയിലെ 88% സ്ഥാപനങ്ങളിലും ഉൽപാദനക്ഷമത കൂടി. ജീവനക്കാർ തമ്മിലുള്ള ആശയവിനിമയത്തിൽ 81% വർധനയുണ്ട്. ഇ–ഗവൺമെന്റ് സേവനങ്ങളും സജീവമായി.

ഹാജർ നിരക്കിലെ വർധന 74%. ജോലിയും കുടുംബജീവിതവും സന്തുലിതമായി മുന്നോട്ടുപോകുന്നതിനാൽ  മാനസികാരോഗ്യവും മെച്ചപ്പെട്ടു. വാരാന്ത്യ അവധി ആഘോഷമാക്കുന്നവരുടെ എണ്ണം 96% കൂടി. സാമൂഹിക പരിപാടികളിലെ പങ്കാളിത്തത്തിലും 70%  വർധന. വ്യായാമം, പരിശീലനം എന്നിവയിൽ 62%, വിദ്യാഭ്യാസം പൂർത്തിയാക്കുന്നവരുടെ എണ്ണത്തിൽ 52% വർധനയുണ്ട്.