സംസ്ഥാന ജൂനിയർ അത‌്‌ലറ്റിക‌് മീറ്റിൽ എറണാകുളത്തിന‌് കിരീടം
തിരുവനന്തപുരം: സംസ്ഥാന ജൂനിയർ അത‌്‌ലറ്റിക‌് മീറ്റിൽ എറണാകുളത്തിന‌് കിരീടം. നിലവിലെ ചാമ്പ്യൻമാരായ പാലക്കാടിനെ മറികടന്നാണ‌് എറണാകുളം കിരീടത്തിൽ മുത്തമിട്ടത‌്. അവസാനദിനം ഒമ്പത‌് റെക്കോഡുകൾ പിറന്നു.448 പോയിന്റോടെയാണ‌് എറണാകുളത്തിന്റെ കിരീടനേട്ടം. 407 പോയിന്റ‌് നേടിയ പാലക്കാട് രണ്ടാമതും 369 പോയിന്റോടെ തിരുവനന്തപുരം മൂന്നാമതുമായി.
നിലവിലെ ചാന്പ്യന്മാരായ പാലക്കാടിന് 18 സ്വർണവും 11 വെള്ളിയും 31 വെങ്കലവും ഉൾപ്പെടെ 407 പോയിന്റുമായി രണ്ടാം സ്ഥാനത്തെത്താനേ സാധിച്ചുള്ളു. ആതിഥേയരായ തിരുവനന്തപുരം 26 സ്വർണവും 12 വെള്ളിയും 16 വെങ്കലവും ഉൾപ്പെടെ 369 പോയിന്റോടെ മൂന്നാം സ്ഥാനത്തെത്തി.
14 വയസിൽ താഴെയുള്ള പെണ്‍കുട്ടികളിൽ 40 പോയിന്റുമായി തൃശൂർ ചാന്പ്യന്മാരായപ്പോൾ 29 പോയിന്റുമായി കോഴിക്കോടാണ് റണ്ണേഴ്സ് അപ്. പതിനാറ് വയസിൽ താഴെയുള്ള വിഭാഗത്തിൽ 56 പോയിന്റുമായി കോട്ടയം ഒന്നാം സ്ഥാനത്തെത്തിയപ്പോൾ 56 പോയിന്റുമായി കോഴിക്കോടാണ് റണ്ണേഴ്സ് അപ്. 18 വയസിൽ താഴെ പ്രായമുള്ള യൂത്ത് പെണ്‍കുട്ടികളിൽ 97 പോയിന്റ‌് നേടിയ എറണാകുളമാണ് ഒന്നാമത്. 75 പോയിന്റുമായി കോഴിക്കോട് രണ്ടാം സ്ഥാനത്തെത്തി. 20 വയസിൽ താഴെ പ്രായമുള്ള ജൂണിയർ വനിതകളിൽ 163 പോയിന്റോടെ കോട്ടയം കിരീടം നേടിയപ്പോൾ 99 പോയിന്റു നേടിയ പാലക്കാടാണ് റണ്ണേഴ്സ് അപ്.
14 വയസിൽ താഴെയുള്ള ആണ്‍കുട്ടികളിൽ 33 പോയിന്റുമായി ആതിഥേയരായ തിരുവനന്തപുരം ഒന്നാമതെത്തി. കഴിഞ്ഞ വർഷത്തെ ചാമ്പ്യന്മാരായ പാലക്കാട് 28 പോയിന്റുമായി രണ്ടാമതെത്തി. യൂത്ത് ആണ്‍കുട്ടികളുടെ വിഭാഗത്തിൽ 97.5 പോയിന്റോടെ എറണാകുളം ചാന്പ്യന്മാരായപ്പോൾ 92.5 പോയിന്റുമായി തിരുവനന്തപുരമാണ് രണ്ടാമത്. ജൂണിയർ പുരുഷന്മാരുടെ വിഭാഗത്തിൽ 106.5 പോയിന്റുമായി തിരുവനന്തപുരം ഒന്നാമതും 98 പോയിന്റുമായി എറണാകുളം രണ്ടാമതുമെത്തി.
